قانون سازی کا طریقہ کار
قانون سازی
مسودہ قانون
کوئی بھی قانون بنانے یا اس میں ترمیم کرنے کی تجویز مسودہ قانون یعنی اس قانون کے مجوزہ مسودہ کی صورت میں اسمبلی میں پیش کی جاتی ہے ۔ مسودہ قانون دراصل قانون بنانے کی ایک تحریک ہوتی ہے ۔مسودہ قانون کے نوٹس میں بیان اغراض ووجوہ شامل ہونا لازمی ہے ، تاہم اسمبلی میں پیش کیے گئے کسی آرڈیننس کےلئے ایسی کسی سٹیٹمنٹ کی ضرورت نہیں ہوتی ۔صوبائی قانون سازی کے دائرہ کار میں آنے والے کسی معاملہ کے بارے میں مسودہ قانون ،قواعد کے تابع ، اسمبلی میں پیش کیا جاسکتا ہے ۔
مسودہ قانون کا پیش کیا جانا
کوئی بھی مسودہ قانون اسمبلی میں پیش کیے جانے کے بعد سرکاری گزٹ میں شائع کیا جاتا ہے اور سپیکر اسے مقررہ تاریخ تک اس کی رپورٹ پیش کرنے کی ہدایت کے ساتھ متعلقہ سٹینڈنگ کمیٹی کے سپرد کردیتا ہے ۔تاہم مسودہ قانون مالیات کسی بھی کمیٹی کے سپر د نہیں کیا جاتا ۔جب مسودہ قانون پر سٹینڈنگ کمیٹی کی رپورٹ موصول ہوجاتی ہے تو مسودہ قانون پر فی الفور غوروخوض کیا جاسکتا ہے ،یا اس کو سلیکٹ کمیٹی کے سپرد کیا جاسکتا ہے یا اس پر رائے عامہ معلوم کرنے کی غرض سے متداول کیا جاسکتا ہے ۔ اسمبلی مسودہ قانون پر تین مراحل پر غوروخوض کرتی ہے جنہیں بالعموم مسودہ قانون کی تین خواندگیا ں کہتے ہیں ۔
مسودہ قانون کی پہلی خواندگی :۔
مسودہ قانون پر غوروخوض کے لئے مقررہ دن پر مسودہ قانون کے اصولوں اور اس کی عمومی دفعات پر بحث کی جاسکتی ہے لیکن مسودہ قانون کی وضاحت کےلئے ضروری ہو ، اس مرحلہ پر اسمبلی کو یہ فیصلہ کرنا ہوتا ہے کہ آیا کہ وہ اس مسودہ قانون پر مزید غوروخوض کرنا چاہتی ہے یا نہیں :
مسود ہ قانون کی دوسری خواندگی :۔
اس مرحلہ پر اسمبلی مسود ہ قانون پر ضمن وار غوروخوض کرتی ہے ۔اس مرحلہ پر کوئی بھی رکن مسودہ قانون میں ایسی ترامیم تجویز کرسکتا ہے جو مسودہ قانون کے دائرہ کار میں آتی ہوں اور جو اس کے نفس مضمون سے متعلق ہوں ۔
مسودہ قانون کی تیسری خواندگی :۔
جب اسمبلی نے مسودہ قانون کی دوسری خواندگی مکمل کرلی ہو اور مسودہ قانون کی تمام ضمنوں پر ووٹنگ بھی ہو ،تو متعلقہ رکن /وزیر کی جانب سے تحریک پیش کی جاتی ہے کہ مسودہ قانون منظور کیا جائے ۔اسمبلی اپنے حاضر اور ووٹ ڈالنے والے اراکین کی اکثریت سے مسودہ منظور کرسکتی ہے ۔
منظور ی اور اشاعت
اسمبلی سے منظور کردہ مسودہ قانون توثیق کےلئے گورنر کو پیش کیا جاتا ہے ۔ جب مسودہ قانون پر گورنر کی توثیق ہوجاتی ہے تو پھر اسمبلی سیکرٹریٹ اسے اسمبلی کے ایکٹ کے طور پر سرکاری گزٹ میں شائع کرتا ہے ۔