Sitting on 22nd April 2025

1.       

جناب احمد خان:

(قرارداد پیش ہوچکی ہے)

اس ایوان کی رائے ہے کہ پنجاب سمیت ملک بھر میں کینسر کے مریضوں میں تیزی سے اضافہ ہو رہا ہے۔ ہر آٹھ میں سے ایک خاتون بریسٹ کینسر کا شکار ہو رہی ہے۔  اس مرض کی بروقت تشخیص اور علاج نہ ہونے سے اموات کا سلسلہ بھی بڑھ رہا ہے۔صوبہ پنجاب کی 13 کروڑ آبادی ہے جبکہ کینسر کے مریضوں کے لیے سرکاری سطح پر سہولیات نہ ہونے کے برابر ہیں۔ پنجاب کے سرکاری ہسپتالوں میں کینسر کے مریضوں کے لیے صرف 410 بیڈ ز موجود ہیں جبکہ علاج و معالجہ کے لیے جدید مشینری کی بھی شدید قلت ہے۔ لہذا اس ایوان کی رائے ہے کہ کینسر کے مریضوں کو سرکاری سطح پر علاج معالجہ کی جدید سہولیات فراہم کی جائیں تا کہ بروقت تشخیص کر کے مختلف اقسام کے کینسر کے کیسز میں اضافے اور اموات کی شرح میں کمی آسکے۔

1.       

محترمہ حنا پرویز بٹ:

یہ ایوان کوٹ مبارک پنجاب اور خیبر پختونخوا کے سرحدی علاقے میں 2 مارچ کو خوارج دہشت گردوں کے گھات لگا کر کیے گئے حملے کو ناکام بنانے پر پنجاب پولیس کے بہادر جوانوں کو زبر دست خراج تحسین پیش کرتا ہے۔ اس دلیرانہ کارروائی میں پولیس نے نہ صرف دہشتگردوں کے ناپاک عزائم خاک میں ملا دیے بلکہ یہ ثابت کر دیا کہ پاکستان کی محافظ فورسز ہر چیلنج سے نمٹنے کی بھر پور صلاحیت رکھتی ہیں۔یہ ایوان خوارج دہشت گردوں کے اس بزدلانہ حملے کی شدید مذمت کرتا ہے۔یہ ایوان اس عزم کا اعادہ کرتا ہے کہ خوارج دہشت گردوں اور ان کے سر پرستوں کو کسی صورت کامیاب نہیں ہونے دیا جائے گا، اور ریاست اپنی پوری قوت کے ساتھ دہشت گردی کے اس فتنے کے مکمل خاتمے تک جنگ جاری رکھے گی۔

2.        

جناب شہباز علی کھوکھر:

اس ایوان کی رائے ہے کہ صوبہ پنجاب میں شہروں کی آب و ہوا کی بہتری اور آلودگی و سموگ سے نجات کے لئے پاکستان مسلم لیگ (ن) کے کارکنان، ممبران پنجاب و قومی اسمبلی کو صوبہ پنجاب میں شجر کاری مہم کے لئے قبل از وقت ذمہ داریاں تفویض کی جائیں۔ کارکنان عوام کو متحرک کر کے پنجاب کے شہروں، قصبوں، دیہاتوں اور ہائی ویز پر پودوں اور درختوں کی بڑی تعد اد لگا کر شجر کاری مہم کو کامیاب بنائیں اوراپنی قومی و اخلاقی ذمہ داری پوری کریں۔

3.        

جناب وقاص محمود مان:

اس ایوان کی رائے ہے کہ 2024 کی گندم پالیسی پر حکومت نے عملدرآمد نہیں کیا تھا جس کی وجہ سے پنجاب کے کسان کو  بہت نقصان ہواتھا۔2025 میں حکومت نے جو گندم پالیسی متعارف کروائی ہے پنجاب کا کسان اس سے مطمئن نہیں ہے۔ یہ پالیسی مڈل مین ، فلور ملز مالکان اور مافیا کو فائدہ پہنچائے گی۔ گندم پالیسی 2025 کسان کو یہ نہیں بتاتی کہ اگر وہ حکومت کے پاس اپنی گندم رکھوائے گا تو اس کو کس ریٹ پر قیمت ملے گی۔ مارکیٹ میں اس کو گندم کی جو قیمت مل رہی ہے اس سے کسان کی لاگت پوری نہیں ہوتی۔حکومت اپنی گندم پالیسی گندم کی کٹائی کے بعد بناتی ہے۔ جبکہ یہ پالیسی گندم کی بوائی سے پہلے واضح ہونی چاہیے۔حکومت پنجاب (Punjab Portal) کے مطابق پاکستان کی80 فی صد گندم پنجاب پیدا کرتا ہے اور پنجاب کی آدھی آبادی زراعت سے منسلک ہے۔ پاکستان کیGDP میں اس سیکٹر کا سب سے بڑا حصہ ہے۔ پنجاب کے کسان اور زراعت کو بچانے کے لیے حکومت پنجاب کو فوری طور پر Cost of Production کو مد نظر رکھتے ہوئے گندم کی ایک مناسب قیمت مقرر کرنی چاہیے۔ یہ قیمت4000 روپے فی من سے کم نہیں ہونی چاہیے اور پرائیویٹ سیکٹر کو پابند کیا جائے کہ وہ مقرر کردہ قیمت پر گندم خریدے اور کمپلینٹ سیل بھی بنایا جائے جس پر کسان اپنی شکایات درج کرواسکیں۔

4.        

جناب امجد علی جاوید:

اس ایوان کی رائے ہے کہ ملک کے دیگر صوبہ جات کی طرح پنجاب میں بھی صوبہ کے انتظامی افسران ( پروانشل مینجمنٹ سروس) کا انتخاب پبلک سروس کمیشن کے ذریعے کیا جاتا ہے پنجاب پبلک سروس کمیشن کے مقرر کردہ معیار کے مطابق عمر کی حد تیسں سال اور تین  کوششیں کرنے کی اجازت ہے جبکہ صوبہ خیبرپختونخوا  اور گلگت بلتستان نے کوششوں کی تعداد تین سے پانچ اور عمر کی حد کو پنتالیس سال تک کر دیا ہے۔اس فرق کو ختم کرنا وقت کی ضرورت ہے ۔لہذا یہ ایوان صوبائی حکومت سے سفارش کرتا ہے کہ مقابلہ کے امتحانات کے لیے کوششوں کی تعداد تین سے بڑھا کر کم از کم چار اور عمر کی حد پینتیس سال کرنے کے لئے متعلقہ قوانین میں ضروری ترامیم کرنے کے لئے عملی اقدامات کئے جائیں ۔

5.        

سید علی حیدر گیلانی (HI):

This House is of the opinion that the Provincial government of Punjab Should declare a local holiday on the death anniversary of the spiritual leader, Pir Syed Ijaz Ali Shah Gillani, Sajjadha Nasheen, Dargah Hazrat Shah Maqeem, Hujra Shah Muqeem, Tehsil Depalpur, District Okara on 13^th April.

لاہور

چودھری عامر حبیب

مورخہ: 21 اپریل 2025

             سیکرٹری جنرل